Մատթեոս 28․ Քրիստոսի hարությւնը և կրկին երևալը։

1 Շաբաթ երեկոյան, երբ կիրակին էր սկսվում, Մարիամ Մագդաղենացին ու մյուս Մարիամը եկան գերեզմանը տեսնելու։ 2 Եվ ահա մեծ ցնցում եղավ, որովհետև Տիրոջ հրեշտակը, երկնքից իջնելով ու մոտենալով, գերեզմանի մուտքից քարը մի կողմ գլորեց և նստեց նրա վրա։ 3 Նրա տեսքը կայծակի պես էր, հագուստը՝ ձյան պես սպիտակ։ 4 Նրա ահից պահապաններն այլայլվեցին և մեռելի պես դարձան։ 5 Հրեշտակը կանանց և ասաց. «Դուք մի՛ վախեցեք, գիտեմ, որ խաչված Հիսուսին եք փնտրում։ 6 Նա այստեղ չէ, որովհետև հարություն առավ, ինչպես ասել էր։ Եկեք տեսե՛ք այն տեղը, որտեղ դրված էր։ 7 Իսկույն գնացե՛ք, ասե՛ք Նրա աշակերտներին, որ մեռելներից հարություն առավ, և ահա ձեզնից առաջ գնում է Գալիլեա. այնտեղ կտեսնեք Նրան։ Ահա ասացի ձեզ»։ 8 Կանայք, վախով ու մեծ ուրախությամբ գերեզմանից իսկույն դուրս ելնելով, վազեցին աշակերտներին պատմելու։ 9 Հանկարծ Հիսուսը նրանց դիմաց ելավ և ասաց. «Ողջո՜ւյն ձեզ»։ Նրանք մոտենալով փարվեցին Նրա ոտքերին և երկրպագեցին Նրան։ 10 Այդ ժամանակ Հիսուսը նրանց ասաց. «Մի՛ վախեցեք. գնացե՛ք, ասե՛ք իմ եղբայրներին, որ Գալիլեա գնան, և այնտեղ ինձ կտեսնեն»։ 11 Երբ նրանք գնացին, պահակազորից ոմանք եկան քաղաք և քահանայապետներին պատմեցին այն ամենը, ինչ պատահել էր։ 12 Նրանք էլ, ծերերի հետ միասին հավաքվելով, խորհրդակցեցին, բավական արծաթ դրամ տվեցին զինվորներին 13 և ասացին. «Կասեք, թե մինչ մենք քնած էինք, Նրա աշակերտները գիշերով եկան, գողացան Նրան։ 14 Եվ եթե այս լուրը կառավարչի ականջին հասնի, մենք նրա սիրտը կշահենք և ձեզ հոգսից կազատենք»։ 15 Զինվորները, արծաթ դրամները վերցնելով, արեցին այնպես, ինչպես իրենց սովորեցրել էին։ Եվ սրա համբավը մինչ օրս տարածված է հրեաների մեջ։ 16 Իսկ տասնմեկ աշակերտները գնացին Գալիլեա, այն լեռը, ուր Հիսուսը կարգադրել էր նրանց։ 17 Երբ Նրան տեսան, երկրպագեցին, բայց ոմանք երկմտեցին։ 18 Հիսուսը մոտեցավ, խոսեց նրանց հետ և ասաց. «Ինձ տրվեց ամեն իշխանություն երկնքում ու երկրի վրա։ Ինչպես որ Հայրն ուղարկեց ինձ, ես էլ ձեզ եմ ուղարկում։ 19 Գնացե՛ք այսուհետև, աշակե՛րտ դարձրեք բոլոր ազգերին, մկրտե՛ք նրանց Հոր, Որդու և Սուրբ Հոգու անունով։ 20 Սովորեցրե՛ք նրանց պահել այն ամենը, ինչ պատվիրեցի ձեզ։ Եվ ահա ես ձեզ հետ եմ բոլոր օրերին, մինչև աշխարհի վերջը»։