Մատթեոս 12:44

Այս խոսքը ներկայացնում է պիղծ ոգու վերադարձի պատմությունը՝ ընդգծելով, որ հոգևոր ազատագրությունը՝ առանց ամուր հիմքի և Աստծու ներկայության, կարող է վտանգավոր լինել։ Երբ պիղծ ոգին վերադառնում է, «տունը» (այսինքն՝ մարդու հոգին) գտնում է «դատարկ, մաքրված և հարդարված», այսինքն՝ անպաշտպան կամ որ նույնն է առանց Աստծու Հոգու ներգործության: Ինչպես կտեսնենք հաջորդ համարում այս նկարագիրը ցույց է տալիս, որ պարզապես չարից ազատվելը բավարար չէ. եթե հոգին դատարկ է մնում, այն դարձյալ ենթակա է չարության ներխուժման։ Հոգևոր ազատագրությունը պետք է ուղեկցվի Աստծու Հոգով լցվելով, որը կպաշտպանի մարդուն չարի վերադարձից։ Հիսուսը զգուշացնում է, որ պարզապես արտաքին բարեփոխումները կամ ժամանակավոր փոփոխությունները բավարար չեն. մարդը պետք է իր ամբողջ էությամբ հանձնվի Աստծուն և թույլ տա, որ Նրա Հոգին բնակվի իր ներսում։ Սա կարևոր դաս է բոլոր նրանց համար, ովքեր ձգտում են հոգևոր ազատագրման. միայն Աստծու ներկայությունն է, որ կարող է պաշտպանել մարդուն չարությունից և ապահովել իրական ու տևական խաղաղություն։