Մատթեոս 17․ Քրիստոսի պայծառակերպությունը։ լուսնոտի բժշկումը և տաճարի տուրքի հատուցումը:

1 Վեց օր անց Հիսուսը վերցրեց Պետրոսին, Հակոբոսին և նրա եղբայր Հովհաննեսին, և նրանց առանձին մի բարձր լեռ հանեց: 2 Եվ նրանց առաջ այլակերպվեց. Նրա երեսը արեգակի պես փայլեց, իսկ հանդերձները լույսի պես սպիտակ դարձան: 3 Եվ ահա երևացին նրանց Մովսեսը և Եղիան, որոնք խոսում էին Հիսուսի հետ: 4 Եվ Պետրոսը ասաց Հիսուսին. «Տե՛ր, լավ է, որ մենք այստեղ մնանք. եթե կամենաս, այստեղ երեք տաղավար կշինենք, մեկը քեզ համար, մեկը Մովսեսի համար, և մեկն էլ՝ Եղիայի: 5 Երբ նա դեռ խոսում էր, ահա մի լուսավոր ամպ ծածկեց նրանց, և ահա մի ձայն հնչեց այդ ամպից՝ ասելով․ «Դա է իմ սիրելի Որդին, որն ունի իմ բարեհաճությունը. Դրան լսեցեք»։ 6 Եվ երբ աշակերտները դա լսեցին, իրենց երեսներով ընկան գետնին և շատ վախեցան: 7 Եվ Հիսուսը մոտեցավ, նրանց դիպավ և ասաց. «Վեր կացեք և մի վախեցեք»: 8 Եվ նրանք բարձրացրին իրենց աչքերը և ոչ ոքի չտեսան, բացի Հիսուսից: 9 Եվ երբ նրանք լեռից իջնում էին, Հիսուսը նրանց պատվիրեց ու ասաց. «Այդ տեսիլքի մասին ոչ ոքի չասեք, մինչև որ Մարդու Որդին մեռելներից հարություն չառնի»: 10 Աշակերտները Նրան հարցրին. «Ապա ինչո՞ւ են դպիրներն ասում, թե նախ Եղիան պետք է գա»: 11 Եվ Հիսուսը պատասխանեց ու ասաց նրանց. «Ճշմարիտ է, պետք է առաջ Եղիան գա և ամեն բան վերահաստատի։ 12 Բայց Ես ասում եմ ձեզ, որ Եղիան արդեն եկել է, և նրան չճանաչեցին, այլ նրա հետ վարվեցին ինչպես կամեցան. այդպես էլ Մարդու Որդին է նրանց կողմից չարչարվելու»։ 13 Այդ ժամանակ աշակերտները հասկացան, որ Հովհաննես Մկրտչի մասին էր ասում իրենց: 14 Եվ երբ նրանք ժողովրդի մոտ եկան, մի մարդ մոտեցավ Հիսուսին, ծնկի իջավ և ասաց. 15 «Տե՛ր, ողորմիր իմ որդուն, որովհետև լուսնոտ է և խիստ տանջվում է. հաճախ ընկնում է կրակի կամ ջրի մեջ: 16 Ես նրան քո աշակերտների մոտ բերեցի, բայց նրանք չկարողացան բժշկել»։ 17 Եվ Հիսուսը պատասխանեց ու ասաց. «Ով անհավատ և խոտոր սերունդ, մինչև ե՞րբ պետք է ձեզ հետ լինեմ, մինչև ե՞րբ պետք է ձեզ համբերեմ. բերե՛ք նրան այստեղ՝ ինձ մոտ»։ 18 Եվ Հիսուսը սաստեց նրան, և դևը նրանից դուրս եկավ, ու տղան նույն պահին բժշկվեց: 19 Այդ ժամանակ աշակերտները առանձին եկան Հիսուսի մոտ և ասացին. «Մենք ինչո՞ւ չկարողացանք հանել նրան»։ 20 Եվ Հիսուսն ասաց նրանց. «Ձեր թերահավատության պատճառով։ Որովհետև ճշմարիտ եմ ասում ձեզ՝ եթե մանանեխի հատիկի չափ հավատք ունենաք, այս սարին կասեք՝ “Փոխադրվիր այստեղից այնտեղ” և նա կփոխադրվի, և ձեզ համար ոչինչ անհնար չի լինի։ 21 Բայց այս դիվային սերունդն այլ կերպ դուրս չի գալիս, եթե ոչ աղոթքով ու ծոմով»: 22 Եվ երբ նրանք շրջում էին Գալիլեայում, Հիսուսն ասաց նրանց. «Մարդու Որդին մատնվելու է մարդկանց ձեռքը։ 23 Եվ Նրան պիտի սպանեն, և երրորդ օրը Նա հարություն կառնի»։ Եվ նրանք շատ տխրեցին։ 24 Երբ նրանք եկան Կափառնայում, տաճարի երկդրամյան հարկ հավաքողները մոտեցան Պետրոսին և ասացին. «Ձեր Վարդապետը երկդրամյանը չի՞ վճարում»։ 25 Նա ասաց. «Այո վճարում է»։ Երբ նա տուն մտավ, Հիսուսը նրան կանխեց և ասաց. «Քեզ ինչպե՞ս է թվում, Սիմոն, երկրի թագավորներն ումի՞ց են վերցնում հարկը կամ տուրքը՝ իրենց որդիների՞ց, թե՞ օտարներից»: 26 Պետրոսն ասաց Նրան՝ Օտարներից։ Հիսուսն էլ ասաց նրան. «Ուրեմն, որդիներն ազատ են։ 27 Բայց որպեսզի նրանց չգայթակղեցնենք, գնա ծովը, կարթ գցիր, և առաջին դուրս եկած ձուկը վերցրու, բացիր նրա բերանը այնտեղ մի սատեր կգտնես: Վերցրու այն և տուր նրանց՝ Իմ և քո տեղը»։